第四回： 永遠子猫

---

🙀= 阿P  😼= 阿O  👩🏼‍🦳= 阿媽 

👩🏼‍🦳 喂，係……。知道，佢哋夠三個月大要做絕育手術，知道，我聽日會準時帶佢哋過嚟。好，到時見。

🙀 阿媽同邊個講電話呀？喵 

😼 好似係愛協果度打電話嚟。喵 

🙀 唔好呀，我唔想返去果度呀。喵 

😼 我哋冇得揀，佢哋規定阿媽肯同我地去做絕育手術先可以帶我哋返屋企㗎。喵 

🙀 好驚呀，好恐怖呀。我唔想去呀。喵

👩🏼‍🦳 猫仔，媽媽其實都唔想俾你哋去做呢個手術，我明白你哋都應該有你哋生存嘅空間，繁殖嘅權利，只係我哋人類以為自己可以操控所有嘢，包括其他生物，甚至環境。但係又總唔會好好思考點樣改變自己去配合其他人和物，反而係要求人哋改變去配合自己。雖然咁講係好左膠，好唔現實。大家會話，因為客觀條件，想出認為係最好嘅方法，等你哋呢啲流浪動物可以同我哋人類一齊住係呢個城市，咁最好成為我哋嘅寵物。又為咗方便飼養，令你哋更加溫馴， 唔想因為你哋繁殖而煩惱。更由於空間有限，俾唔到你哋更大嘅自由活動嘅地方，就算你哋浪浪已經努力喺呢個城市掙扎生存，我哋都係為咗減少你哋對我哋生活環境嘅影響，就諗出限制你哋生育，就可以解決你哋帶嚟嘅影響。另一方面，亦提倡係為你哋着想減少將來生病嘅可能性，所以最好為你哋做絕育。我都相信好多義工朋友係真心為咗你哋好而捉你哋做絕育再原地放養。因為咁樣，可以換來一個大家都好過嘅居住環境。 記得小時候，一到某啲季節，就會聽到出面啲貓貓不停叫，初時以為係BB喊，後來先知原來係貓貓叫。仲有一次，係返學路上見到隻貓BB，佢好細隻，當時好想帶佢返屋企，但因為趕住返 學，所以只好同佢講要好好留喺嗰度等我放學。咁到我放學路過時，已經見唔到佢，初初以為佢已經被其他有心人收留咗啦，誰不知再行前就見到佢係車路上面…… 直到而家我都好後悔，點解當時唔即刻帶走佢。而家屋企附近少咗好多流浪貓狗，可能係好事，但係我反而覺得係我哋侵佔咗佢哋嘅生存空間。

😼🙀 唔好傷心，有媽媽你對我哋好就夠啦，咁我哋就一直都可以做子貓，一直都有媽媽照顧 ，我哋都會好開心㗎。喵

所有圖片由作者提供

---

Previous articles