第五回：子猫物語(上)

---

🙀= 阿P  😼= 阿O  👩🏼‍🦳= 阿媽 

😼 上回講到我哋要去做手術。喵

🙀 十年前嘅嘢唔好再提啦好唔好。喵

😼 呢個都係我哋歷史嘅一部分嘛。喵

🙀 呢啲嘢唔提就算啦。喵

😼 我哋要接受自己嘅歷史，先至可以接受而家嘅自己，同埋做個更好嘅自己㗎嘛。成日隱瞞事實係唔會有進步㗎。喵

🙀 你都有道理嘅，但係我提起都仲好驚呀。喵

😼 放心啦，已經過咗去啦，我哋去睇吓阿媽做緊咩，有冇嘢俾我哋食仲好過啦。喵

😼🙀 媽，我哋有咩食呀。喵

👩🏼‍🦳 你兩個又想食嘢？未夠鐘食飯喎。不如我哋一齊睇返套戲先啦。你哋一定好鍾意㗎。

😼 冇嘢食睇下電視先都好啦。喵

🙀 咁係唔係啱我哋猫仔睇㗎？喵

😼 唔好理咁多啦，有得瞓喺阿媽大脾暖笠笠咁睇電視夠好啦。喵

👩🏼‍🦳 猫仔，我哋不如睇番呢套「子猫物語」吖。呢套戲係1986年嘅作品。果時媽媽仲好細個，係婆婆帶我去戲院睇架，仲記得當年係去利舞臺度睇。但係好可惜間戲院（利舞臺）已經冇咗好耐喇。其實真係好可惜，呢個舞臺好靚，有兩層觀眾席。我有時都真係好唔明啲人究竟用乜嘢去衡量事物嘅價值，應該保留呢啲真正屬於藝術文化遺產又唔保留，淨係商業行先。試問而家啲年青人有邊個知道利舞臺原來係個大舞臺？而家啲人只會知道佢係時代廣場隔離嘅其中一個商場囉。唉，我哋都係唔講呢啲住，我哋睇戲先。

😼 雖然我未見過呢個地方，但係都好唔想啲咁靚嘅嘢冇咗。好彩我哋而家可以喺屋企睇戲啫

，唔好講咁多，開場啦。喵

🙀 咦，呢隻猫仔個樣咁似我嘅。喵

😼 又真係幾似喎。喵

🙀 佢仲有個狗狗friend 呀，就好似有你陪住我咁呀。喵 

😼 冇計啦，你咁論盡，冇我喺你身邊睇住你，都唔知你仲係咪喺度流浪街頭呀。喵

🙀 呢啲係叫做冒險呀。喵

😼 好啦好啦，我哋睇戲先。喵

🙀 首歌好好聽呀。喵

😼 係呀，首歌係坂本龍一先生作㗎，雖然佢舊年離開咗我哋，但就留低咗好多首雋永嘅作品俾世人。喵

🙀 乜你知道咁多嘢嘅？喵

😼 係我成日陪住阿媽一齊睇新聞吖嘛。喵

🙀 你睇，子猫掛住同狗狗玩，唔小心跌咗落條河個木箱度呀。喵

😼 點算呀，好緊張呀。喵

🙀 沖走啦，點算好呀。喵

🙀 狗狗一直追住佢，想救返子猫呀。喵

😼 河流啲水越嚟越急啦，點算好呀。喵

🙀 嘩，仲遇到熊仔呀！喵

😼 係真嘅熊，唔係熊仔餅呀！喵

🙀 點算呀。喵

😼 我哋睇埋落去咪知囉。喵

（待續…）

網上圖片

---

Previous articles