從今以後 (二)

---

圖一

上星期講到 《叔·叔》導演 Ray Yeung 帶新作《從今以後》去今年柏林影展世界首映，篇文出街前後，就有更加多好消息傳返香港。

首先，新戲成功攞到 Teddy Bear 大獎。如果你比較熟悉柏林影展，都知熊正正係影展吉祥物啦，而影展競賽部份最佳電影大獎，就叫金熊獎。其實《從今以後》並非今屆柏林影展競賽部份，只入選 Panorama 部份，不過 Teddy Bear 大獎並未有分部份，只分題材，只有今屆柏林影展裡面，電影題材同 LGBT 有關，才有份競逐，而攞得 Teddy Bear，就代表今屆柏林影展最佳同志電影。

到上周末影展閉幕，《從今以後》再下一城，贏得最受觀眾歡迎獎季軍，只有 Panorama 部份電影，先可以參加最受觀眾歡迎獎。據聞觀眾獎向來受片商重視，因為代表大眾市場口味，而《從今以後》全球發行 Films Boutique 亦在柏林影展舉行期間，成功賣出多個歐洲國家放映版權；對照今時今日港產片早已經今非昔比，仲要份屬同志獨立電影（某程度上代表市場小眾，又欠缺大卡士如成龍、甄子丹、楊紫瓊、周潤發或者梁朝偉），成績非常難得。

講到發行公司，一部香港電影，竟然由德國公司 Films Boutique 做全球發行（亦有發行日本當紅導演濱口瀧介作品），可想而知並不簡單。上星期本欄講到導演 Ray Yeung 有自己班底，今次隨行去柏林幾位監製正是功臣，位位各司其職：兩位本地監製 Sandy 以及我太太 Teresa 主管製作同行政；三位外籍監製之中，Chowee 同 Stan 堪稱導演精神支柱，只要到過拍攝現場，你會發覺 Chowee 永遠同導演排排坐，當 Ray 走入演員當中教戲，Chowee 依然會留守 monitor 前面觀察現場；而最後一位監製不得不提，正正體型最龐大之 Michael。

當年 90 年代，有一間荷蘭電影發行公司叫 Fortissimo Films 眼光獨到，將亞洲電影引入西方市場，令香港導演王家衛、日本導演岩井俊二以至馬來西亞裔台灣導演蔡明亮等等，走上國際舞台，Michael 正正 Fortissimo 其中一位主將，《從今以後》入選柏林影展以至由德國公司發行，背後都有 Michael 在發揮影響力。

有華語媒體形容《從今以後》於今屆柏林影展一票難求，前後六場全部爆滿，評論主要盛讚劇本（導演 Ray 自己編劇）以至演員演出，下星期可以同大家繼續介紹部份幕後操作。

圖片由作者提供

---

Previous articles