再到所羅瑪

---

聲音導航 - 開聲「聽」文章

上星期先由大阪亞洲電影節返到香港 Filmart，今個星期又要再飛。執筆當下一刻，已經人在機場，今次要飛去美國加洲，因為《全個世界都有電話》入選 Sonoma International Film Festival，今個星期六，3 月 24 號，美國西岸時間下晝 4 點，會放映一場。

上年代表香港入選同一個電影節，有《飯戲攻心》，今次亦算做我第一次入選 Sonoma 電影節，不過就並非我第一次去 Sonoma。其實 Sonoma 究竟位於何方？基本上位於三藩市北面，距離大概兩個鐘車程，有錢人地方，釀酒重鎮，可惜我不煙不酒，去到酒莊都無福消受。

上一次去 Sonoma，已經差不多九年前，因為當地有個賽車場，而我當時要幫香港電台電視部拍一個外判紀錄片，講兩個香港人於美國賽車壇發展情況，而我一直都不知道，原來 Sonoma 仲有個國際電影節。

20 個小時之後，當我再次踏足 Sonoma，去到影展現場，會立即影幾張相到 Livesup.co 編輯部，將現場情況第一時間傳給各位讀者睇睇。事實上，如無意外，今次影展亦會成為《全個世界都有電話》最後一個首輪影展，11 個月前，上年 4 月底，部戲有幸入選 Far East Film Festival，可以在意大利 Udine 舉行世界首映，亦是我第一部戲，於海外影展進行世界首映。一部電影，完成第一年首輪放映，生命周期就會進入下一階段，某程度上，正式變成一部「舊戲」。

圖片由作者提供

---

Previous articles