由大阪到香港

---

聲音導航 - 開聲「聽」文章

上星期講到自己出發去大阪亞洲電影節。

上星期日出席自己第四部戲《全個世界都有電話》第二場放映，當日全院滿座，多謝日本觀眾支持，完場後幫影迷簽場刊，仲收到幾份禮物，只能夠講句多謝大家支持。事實上，今次已是自己第四次入選亞洲大阪電影節，第一次是2015年我第一部戲《點對點》；第二次是2020年短片《四段四分鐘》，第三次是2022年《緣路山旮旯》- 而這兩次都發生在疫情期間；所以今次只是我第二次親身出席，不過現場不少觀眾，以上四部片都看過。事實上，大阪確實有一班觀眾，非常支持香港以至亞洲電影，大多是中年人，年青人比較少。

今時今日，年輕一代已經同我七十後一代非常大分別，自小習慣上網找娛樂，去戲院睇戲變成非日常娛樂主流；睇戲等同睇戲曲睇舞台劇，可能十至十五年後就會變成現實，大量（不會全部）戲院將會結業。

出席自己電影放映之餘，在電影節期間亦看了兩部亞洲電影，包括泰國電影《No Friends》、以及美國日本兩地合拍片《Tokyo Cowboy》（也是今屆閉幕電影），有機會再同大家傾傾。睇戲之外，我亦乘機去過寶塚市以及東大阪市，去參觀手塚治虫（漫畫動畫家）以及司馬遼太郎（作家）紀念館，去影展就有以上好處。

星期一返到香港，星期二、三都有去 Filmart 走走。Filmart 是甚麼？亞洲電影業內工展會，主要由行內人參觀，並非面向觀眾。我太太有新監製 project 入選 HAF（創投會，我會遲少少同大家介紹是甚麼），所以日日在場。我入場也可以見見同行朋友，特別是台灣同新加坡行內朋友，而結果星期二晚同新加坡導演巫培雙去灣仔三六九飯店食上海菜晚飯，就撞到發哥周潤發。

圖片由作者提供

---

Previous articles