由柏林到大阪

---

聲音導航 - 開聲「聽」文章

香港導演 Ray Yeung 新作《從今以後》在柏林影展連獲兩獎，新戲將於五月初在香港正式公映，而想在香港先睹為快，其中一個機會正是香港國際電影節，因為《從今以後》將會是今屆開幕電影。

上期講到《從今以後》在德國首映之後，以劇本同演員最受讚賞，好多評論都認為戲中人物角色有血有肉。事實上，導演 Ray Yeung 不單止繼續有大量劇本圍讀，向適齡女同志群體做資料搜集，廣徵意見；原來仲有另一個新招數：導演在紐約潛心修改劇本（Ray 習慣用英文寫劇本，再翻譯中文版本，給台前幕後去籌備）期間，原來在當地找來一批舞台劇演員，把劇本排演多次，過程之中，多位舞台劇參與者固然會有問題有 input，導演亦可以從多次預演之中，尋找到更多演出可能性。

講過《從今以後》三星期，是時候講講自己。

之前都已經提過，我上年第四部電影《全個世界都有電話》，入選今年第 19 屆大阪亞洲電影節，上星期五 3 月 1 號已經完成第一場放映兼日本首映，3 月 10 星期六仲有一場下晝場，放映地點位於梅田 ABC Hall，今時今日有好多香港人移居日本，有時間不妨捧場。

執筆之時，正正上機去日本，好有趣，去到機場，同一班國泰上晝去大阪班機，不單止撞到《盜月者》袁劍偉導演，又撞到《填詞L》黃綺琳導演，所以大家都影張相留個念；兩部戲都有入選今屆大阪亞洲電影節。而同一班機竟然仲有 Sophie-san，電影節指定廣東話日文翻譯。Sophie-san 曾經住過香港十年，份屬李小龍超級粉絲，近年又再搬到香港住，日文之外，亦精通英文以及普通話，不過以講得出近乎完美廣東話最犀利。

不過最有趣最有趣，大家都搭同一班機之外（機票其實由大阪電影節負責購買），班機其實仲已經有得睇《全個世界都有電話》，事實上類似情況好少好少有機會出現，今次認真巧合。

圖片由作者提供

---

Previous articles