搵食

---

來到最後一期稿，執筆之時正在澳洲悉尼機場轉機，如果你作為讀者，覺得電影導演生活，等於日日去海外影展，日日都毋須工作，好開心。

現實當然並非如此，一來今次去澳洲其實因為有相熟朋友結婚；二來乘機於澳洲多搞兩場放映，見見澳洲觀眾 ；整個旅程屬於聯誼不忘工作，並非去海外影展飲飲食食。

點解我拍電影成本可以好低，拍攝日數可以好少？好多人以我拍戲拍得好快，其實我講過好多次，我現場拍攝速度屬於正常，拍攝日數少是源自寫劇本時候已經特別關注點樣可以拍得快，例如將場景減少以至集中，盡量將角色數量壓低，少場景少角色，自然拍得快。

再數，我拍戲大部份主創，如導演編劇監製都一律不收收片酬，以正常一部電影計，主創片酬隨時佔15至20%，500萬成本已經等於75至100萬，所以成本先可以低，而且同香港大部份商業肥上瘦下結構運作都相反，我拍戲完完全全肥下瘦上。

不收片酬，只收電影股權，我拍電影絕對零可能搵到錢搵到食，絕對為興趣，點生活？為生活，我會接拍商業 jobs，例如幫人拍攝宣傳片或者紀錄片之類之類。

過去兩星期，出發去澳洲之前，我就正在為本地一支籃球隊香港金牛，拍攝宣傳短片，前後拍三日半，已經完成兩日半，仲有一日有待四月底由澳洲返回香港才繼續拍，以下幾張相正正拍攝花絮。

---

Previous articles