影展前後

---

上星期帶我第四部電影《全個世界都有電話》出席 Sonoma International Film Festival（SIFF），在 Sonoma 這個加州富裕小鎮渡過五日，認識新朋友，認識新地方，正正出席電影節常情，而在出席電影節前後，正正去旅行以及見舊朋友好時機。

身處 Sonoma 期間，就已經有昔日演藝學院同學，由三藩市即晚來回開車三個鐘，一齊食餐晚飯，對上一次見，隨時已經九年前。至於影展一場放映，反應亦不錯，需知 SIFF 觀眾層面非常社區性，而 Sonoma 大部份居民都屬於退休白人，有知識有財富有時間，所以場場放映都坐無虛席，氣氛甚佳。

同《緣路山旮旯》比較，世界各地觀眾，對《全個世界都有電話》，笑點都非常一致，相反前者都去勻不同地方上畫以及影展，世界各地觀眾，都有不同笑點。

離開 Sonoma 之後，坐車返到三藩市，同當地朋友食餐晚飯，第二朝就內陸機飛去到洛杉磯，同樣見朋友食飯，包括美籍華裔獨立導演 Quentin Lee、我頭兩部電影女主角 Candy Cheung 以及我第一同第四部戲特效總監 Jack Ho 等等。前兩位相識差不多廿年，後者更屬於我中學同學。三位都帶我去不同 LA 名勝，而我發覺，疫情完結之後，去過歐洲、澳洲同加拿大，物價最高，其實加州，總之一出街食，就要 200 蚊港幣一個人。

最後，上星期先寫，以為 Sonoma International Film Festival 會成為《全個世界都有電話》最後一個首輪影展，點知返到香港，收到消息，原來九月仲有入選另一個電影節。

圖片由作者提供

---

Previous articles