第七回：《子猫物語》後記 赤子初心

---

聲音導航 - 開聲「聽」文章

🙀= 阿P  😼= 阿O  👩🏼‍🦳= 阿媽 

😼 睇完套戲你覺得點呀？喵

🙀 睇到中間嗰段茶虎跌落懸崖果幕，好擔心呀！雖然知係做戲啫，但都好驚㗎嘛。喵

😼 當時都好多動物權益組織都提出過呢個問題，覺得係罔顧動物生命安全。但從另一個角度睇，我覺得導演係想講人生無論遇到咩挫折衝擊，都要努力克服，只要一息尚存，都唔可以放棄。喵

🙀 同意呀，成套戲都俾我感覺到呢個世界好有生命力，同埋對生命嘅歌頌。見到所有初生之犢對呢個世界嘅好奇，為求生存積極面對、克服生命中遇到嘅各種各樣無法預知嘅難題。喵

😼 如果呢個世界好似喺套戲入面咁，遇到嘅小動物都係咁單純，要克服嘅就只係大自然嘅挑戰，咁樣要生存就一定唔難。只不過係呢個現實世界，比我哋想像嘅複雜得多，所以我哋要保持善良嘅心，同時亦要識得點樣保護自己。就好似茶虎跌咗落海，憑自己努力游返上岸，之後揾到間小屋暫時棲息，但係又突然有隻黑熊闖入去，好彩佢夠機智嚇走隻黑熊，如果唔係就白白俾隻黑熊當午餐咁食咗落肚啦。喵

🙀 既要保持呢個初衷，又要小心唔好被人傷害，唔容易喎。俗語有話：人善被人欺。究竟點先算善良呢？ 有求必應就係好人咩唔通？喵

😼 我認為善良嘅人最起碼要有同理心。有人話，善良係一種選擇。我就會話善良直頭係生存嘅價值。如果你話咁樣好易被人利用，咁就曲解咗我對善良嘅定義。 首先你為咗乜做好人，係咪想善有善報？唔係囉。行善係由心而發，從無諗過做咗之後要得到啲乜嘢，正所謂施恩莫望報。如果要為咗利益先做好人，根本就唔係真善。喵

🙀 但係未必人人都咁諗㗎嘛。其他人可能會以為你對佢好係另有目的 㗎喎。喵

😼 明白嘅，有啲立心不良嘅人係有可能利用其他人嘅同情心去搵著數。所以我哋就要更清楚自己嘅立場，知道邊啲先係真正需要幫助嘅。喵

🙀 真心希望呢個世界多啲善良嘅人。赤子之心純真無邪，但唔等於無知。喵

圖片由作者提供

---

Previous articles