第十一回： 櫻花+桃花=櫻桃小丸子

---

🙀= 阿P  😼= 阿O  👩🏼‍🦳= 阿媽 

🙀 話咁快又過咗一年啦，又見到啲好靚嘅花樹啦，再過多一陣又見到落花雪啦。要趁花見嘅日子出去影多啲靚相呀。喵

 😼 而家啲人一到三、四月就係咁去打卡影櫻花相，而且而家啲人講到全世界都影到好靚嘅櫻花相咁啦。美國、加拿大、倫敦有、連香港都有呀。喵

🙀 咁都唔係全世界，淨係有四季嘅地方先會種到嘅啫我估。你睇下出面條街果棵樹啲花咁靚，係唔係樱花樹嚟？喵

😼 應該係啩。見到成棵樹都開住淺粉紅色嘅花，風一吹就飄到啲花瓣四圍都係，咁嘅樣應該係喇啩。喵

🙀 乜你咁唔科學㗎，究竟你識唔識㗎？喵

😼 我點知喎，啲花呀樹呀咁多種，又咁多名，點知咁多呀，靚咪得囉，你坐定定慢慢欣賞啦。好快啲花就唔見晒㗎啦。喵

🙀 我一定會睇實有冇雀仔嘅你放心。喵

😼 我係話啲花，唔係雀仔呀。喵

🙀 啲花落咗點解唔見有車厘子嘅？喵

😼 咁我又唔知喎。可能俾啲雀仔食晒啩。喵

🙀 所以我都話要睇實啲雀仔㗎啦。咦係喎你話香港都有？點解我以前冇見過嘅？喵

😼 唔係周街都有吖嘛。淨係某一啲地方，有種咁咪有囉。喵

🙀 阿媽話佢細個時唔知原來香港都有櫻花，第一次睇櫻花初見唔係係日本，而係喺溫哥華，啲櫻花開滿街兩旁，每次揸車行過條路啲花瓣就飛起晒。好浪漫呀。喵

😼 咁阿媽仲有冇同你講，佢之前都分唔出櫻花定係桃花？喵

🙀 我知我知，有車厘子嘅就係櫻花，有桃食嘅就係桃花。喵

😼 我係講緊過年果啲桃花呀。以前係香港過年桃花比櫻花多。啲人係屋企擺放桃花就好少會放櫻花嘅。阿媽仲話佢細個嗰陣，公公婆婆同朋友會專登係過年前去新界啲花農度揀一棵靚靚嘅桃花返屋企。佢同啲小朋友就會喺果啲花地度穿嚟穿去玩，玩得好開心。佢仲話都見過啲花開完係會粒桃仔㗎。不過好細粒咁唔食得㗎囉。喵

🙀 點解冇拿拿講咗桃花架？我哋講緊櫻花呀。喵

😼 乜你冇睇過櫻桃小丸子咩，有櫻有桃就有小丸子。賞櫻梗係要正式跟日本人咁，係櫻花樹下野餐咁先係真正識欣賞大自然嘅美㗎嘛。花見時間好短暫，美好嘅時光都好短暫。趁而家良辰美景快啲同屋企人朋友出去行下玩下，珍惜相聚嘅時刻啦。喵

圖片由作者提供

---

Previous articles