🙀= 阿P 😼= 阿O 👩🏼‍🦳= 阿媽

🙀 咦你睇下，呢本書同我哋一樣飛過大江大海一齊過咗嚟放咗係呢度個書架度喎。喵

😼 係呀，係阿媽其中一本收藏。因為佢通常都只係喺圖書館借書睇，睇完就還，還咗再借，唔洗佔屋企嘅空間。佢話除非係哥哥要用嘅參考書，又或者係一啲特別值得留念同埋第日會再睇番嘅書，佢先會買返嚟放喺屋企個書架度。喵

🙀 哦原來係咁，咁唔知呢本書有乜特別呢，個封面乜design都冇，好普通咋喎。喵

😼 其實阿媽好早之前已經喺圖書館睇過呢本書，當時佢心諗圖書館仲可以放呢類書，呢度仍然有自由表達意見嘅空間，勢估唔到當刻暗暗覺得係時候要留起應該要保留嘅書藉文章，將真實嘅歷史記錄低嘅呢種諗法，真係會發生，而呢個地方竟然真係會變得咁超乎想像。喵

🙀 係呀，雖然電子世界睇起嚟係好方便，但係當中嘅真假實在難分。要知道一本書經作者用咗咁多時間心機去寫作，然後又經編輯校對，再去印刷成書。呢啲嘢係好有保留嘅價值，但係現代人因為種種理由，覺得呢種產物係過時，甚至可以被取代。所以我哋更加要好好保留一啲實質嘅嘢。喵

😼 無錯，所以我哋要識揀，兩者皆有好有唔好，生活方式係點，從來都可以由自己去做決定嘅。喵

🙀 咁又點解決定買呢本書呢。喵

😼 我估係阿媽對龍應台寫嘅文章都好有同感。而且龍應台寫呢本書的確花咗好多時間做研究、資料蒐集、採訪等等，為的是要留給下一代一個比較全面嘅紀錄。喵

🙀 係喎本書都好厚下。喵

😼 其實呢代人喺呢個地方嘅歷史，話長唔長話短唔短，但係當中所發生嘅事，真係好似鬼魅咁，重複又重複咁樣發生。喵

🙀 咁咪即係話果啲人根本無吸取教訓同經驗。又或者係佢哋由始至終都喺度自欺欺人，從無跟住時代進步過。喵

😼 都可以咁講，由一九四九起呢個地方就一直原地踏步，仲自以為超越咗其他人。但實情係受苦受傷害嘅從來都係果班只為活著而付出嘅平民百姓。喵

🙀 最鬼魅嘅係當時專登去買呢本書返嚟再睇嘅時間正正係二零一九年年初，當時重睇都只係當做一個歷史回顧，更心諗好彩我哋出生於一個新嘅世代，呢啲歷史就將佢放返係博物館度，唔好再俾佢重演。點知時空穿梭，竟然要經歷一次從來無法想像嘅巨變。就好似將以前太婆口述嘅歷劫畫面放咗係現實世界中再輪迴轉世咁，實在太恐怖。喵

😼 所以我哋都係選擇咗用腳嚟投票。雖然是禍還是福都未知，但係點都好，我哋都要一齊加油努力。約定，未來見。喵

圖片由作者提供