第八回: 給予者

---

聲音導航 - 開聲「聽」文章

🙀= 阿P  😼= 阿O  👩🏼‍🦳= 阿媽 

😼 哥哥考完試，係咪開始放暑假喇？唔知今日可唔可以同我哋坃呢？喵

🙀 雖然哥哥今日唔駛返學，但係佢睇緊書，唔得閒陪我哋玩喎。喵

😼 唔知哥哥睇緊乜嘢書呢？好似好好睇咁喎。喵

🙀 我都唔知呀，淨係見到本書個封面有個老人, 書名寫住 “The Giver”。作者係 Lois Lowry。喵

😼 咁咪即係「給予者」嘅意思？咁得意嘅，授予啲乜嘢呢咁？ 喵

🙀 乜你識睇英文嘅咩？喵

😼 識少少咁囉。阿媽同哥哥都鍾意去圖書館借好多唔同嘅書返嚟睇，陪佢哋睇得多，聽到佢哋不時討論下啲書講乜，唔多唔少都知啲啲嘅。喵

🙀 乜你唔係淨係識得食㗎咋咩？ 喵

😼 哎吔，費事同你講咁多，等我跳上去哥哥度同佢一齊睇書好過。喵

🙀 唔好攪住哥哥啦，佢實叫你一陣先玩㗎啦。喵

😼 又俾你講中咗𠻹，等我去搵阿媽，睇吓佢可唔可以講呢個故仔俾我哋聽先。喵

🙀 好呀，我又去!  喵

👩🏼‍🦳 做乜呀你兩個？哥哥又唔得閒同你哋玩呀？

😼 哥哥睇緊書呀，我想知本書講乜呀。喵

👩🏼‍🦳 哦，原來哥哥睇緊呢本書。呢本書係舊年喺圖書館借過嚟睇，跟住果年十月套戲喺香港戲院都有上映。仲記得嗰陣時係哥哥中一學校考試，中間有幾日放假，咁就當中埸休息去睇吓戲啦。The Giver呢套書除咗第一部The Giver之外，跟住仲有三部，分別係 Gathering Blue, Messenger 同埋 Son。作者Lois Lowry係美國少年小說作家。我哋睇咗第一部之後，覺得個故事幾有趣，所以喺書展買咗呢套書。哥哥梗係想趁放假時追番之前個故事同埋再睇埋之後嗰幾部。

🙀 哦，原來呢個小說仲拍埋戲𠻹呀。喵

👩🏼‍🦳 套戲名係「未來叛變」。當時唔係有好多宣傳，較為人熟悉嘅演員就係梅麗史翠普。而套戱𥚃面有啲片段喺大陸唔能夠通過審批，所以當時都叫做有啲noise，加上我哋嘅傘運剛剛結束，套戲係果陣時上映，真係一個巧合。

😼咁我真係更加想知本書究竟講乜嘅呢？ 喵

🙀 我都想知呀，如果可以睇埋套戲𠻹咁就仲好啦。喵

👩🏼‍🦳 咁等陣我哋食完飯再重溫番呢套戲吖。

待續…

圖片由作者提供

---

Previous articles