之前 … 之後 - 第一回 ：從九龍到香港
🙀= 阿P 😼= 阿O 👩🏼🦳= 阿媽
😼 喂！ 今日幾號呀？ 喵。
🙀 吓， 我唔知喎，你睇下個日曆啦，喵。
😼 係今日喇！ 呢度寫住架 2015年1月3日呀， 喵。
🙀 嘩， 即係今日阿媽同哥哥會嚟睇我哋呀！仲好似話想帶我哋返屋企𠻹呀， 喵 。
😼 係咪真㗎？ 喵。
🙀 係呀， 佢哋嚟緊啦， 喵。
😼 第一次見面係有少少興奮㗎啦，我真係忍唔住要跳上去哥哥嘅膊頭度喇， 喵～ 睇嚟佢都應該幾中意我，冇趕我走。我都好中意佢呀 ！喵～ 佢哋應該會對我哋好好，有屋企暖笠笠，又有好嘢食，咁就perfect 啦 ，喵。
🙀 你咪咁天真啦，第一次見面咋， 喵。
😼 睇你驚青果個樣，唔駛再流浪，又唔駛留係收容所果嗰玻璃櫃度，仲想點呀？俾個可愛樣佢哋睇吓先啦，唔好嚇親佢哋呀， 喵。
🙀 第一次見面就咁熱情先嚇親人呀 ，喵 。你咁樣我哋安唔安全㗎！？ 我哋係咪真係有得返屋企㗎 ？喵。
😼 唔駛驚喎，要驚兩份， 喵。
～～～
😼 過咗咁多日都未見阿媽嚟接我哋㗎 ，喵。
🙀 鬼叫你身子弱又染咗傷風，啱啱聽到愛協姨姨同阿媽講電話，佢話要等到你好番晒先可以接我哋返屋企呀， 喵。
🙀 我今朝又聽到愛協姨姨話阿媽想過嚟睇吓我哋呀，但係你仲未好番，所以唔俾阿媽嚟呀， 喵。
😼 哈啾… 咁我哋仲要等幾耐先有得返屋企呀？喵。
🙀 都話要等你好番晒先得咯 ，喵。
😼 咁今日幾號呀 ？喵。
🙀 好似係1月10號呀 ，喵。
～～～
😼 今日佢哋放我哋去間房度玩，等我搵吓有乜好嘢食先， 喵。
🙀 你咪成日掛住食啦，你係咪已經好番晒啦， 喵。
😼 係掛？ 喵。
🙀 咁阿媽係咪會嚟接我哋呢？ 喵。
😼 嘩！ 阿媽已經嚟咗啦，你走去邊呀？ 喵。
🙀 個袋好黑呀，不過個袋入面放咗啲好香嘅猫草，同埋張毛巾好舒服呀 ，喵。
😼 你咪逼過嚟啦！ 喵。
🙀 我哋要返屋企啦 ！喵。
👩🏼🦳 你兩個聽住呀，踏出咗呢個門口，今日開始你哋就要跟住我，無論日後去邊我都會帶埋你哋，你哋要跟實，知道未？
😼🙀 知道啦， 喵。 我哋一定跟實阿媽㗎， 喵。
🙀😼 拜拜九龍，我哋去香港啦， 喵。
👩🏼🦳 好啦，我哋要搭巴士，要細聲啲呀，如果唔係司機叔叔聽到，可能唔俾我哋上車㗎。
😼🙀 。。 （靜默中）
👩🏼🦳 我哋而家要經過海底隧道啦，你哋乖，好快我哋就到銅鑼灣㗎啦。
😼🙀 。。 我哋第一次搭巴士，亦係唯一一次，仲要係搭過海巴士嘅上層。好開心呀 ！喵。
所有圖片由作者提供
