橋樑

---

我拍獨立電影，第一部戲《點對點》十年前公映，企正香港電影主流工業外圍。香港電影主流工業，這個範疇，一般香港人都覺好神秘、好好奇，而且仲有好多誤解。

一直都同意，有競爭先有進步，而點樣先有健康競爭呢？首先個比武擂台，要透明，要公平公正，而且行上擂台個門檻愈低愈好。所以，如果由練武、授武、賣武裝，起擂台，以至最後比武、賣武，都全部由一班人甚至一個單位包辦，出現壟斷，這地方，武術一定倒退。

港產片影壇，同香港好多範疇一樣，從來都小圈子。外人好難入行，差不多所有職位，都難以上網或者睇報紙，就見到有公開招聘廣告；新人入到行，亦好難生存，因為一開始，薪酬未足以養家，甚至養自己都未夠。

行內某些職位，開兩三日工就等於新人一個月薪金；而某些高層一餐晚飯價錢，就剛剛等於新人半個月人工。

作為一個人企正外圍，我希望透過今次有機會寫專欄，可以做一道橋樑，將業內部份情況解釋清楚，令讀者避免誤解，有相對正確認知，嘗試促進資訊流通。

事實上，一般觀眾水平、正規影評水平、宣傳發行水平、技術製作水平、思考創作水平、行業管理水平、美學教育水平：一個行業，一個城市，其實全部相輔相成。

香港電影已經去到谷底，上年適逢迴光返照，最後壽終正寢？抑或會谷底反彈，否極泰來？我點會有答案，我都奢望能夠預知未來，而我既然決定為興趣繼續，就只能夠盡力做。

所有圖片由作者提供