揀擇

---

早幾個星期，我發覺自己又失去創作內容嘅動力。其實兩年前都試過一次，結果停咗寫作足足一個月。我唔係無題材，只不過係點都提唔起勁。呢段日子，我寧願做啲唔需要用腦嘅事，例如搬吓家俬、洗吓地之類。

當然，都有讀吓書，學啲新嘅知識，但感覺力不從心。我覺得，係時候要更徹底咁去重新調整自己嘅工作同生活。畢竟，想做嘅事可以有無限多，但可以做嘅事就有限。人生去到呢個階段，一定要識得揀擇；唔揀擇，生命會消耗得更快。

首先，我決定推哂所有訪問、約稿；以後除咗我好有興趣嘅題目，否則，唔好意思，各位記者朋友、節目主持，你哋都係搵其他人喇。甚至係我有興趣嘅題目，我都好可能會選擇用自己嘅方法去分享。

另外，就係減少上 facebook 之類嘅社交平台。假如問我係唔係因為數字大法，我都唔識答；可能多少都有啲關係，但肯定有其他嘅原因。一來，我本身就係一個好怕社交嘅人。二來，我覺得社交媒體上有太多嘈音，太多無意義嘅內容，好容易一睇就幾個鐘，然後一日，一個星期，一個月就咁過去。呢種感覺其實好可怕。人唔係忽然間咁死亡，而係不知不覺間咁樣被呢啲無意義嘅事消耗人生。

有啲人覺得，開咗個頻道，就要一早一晚日復一日咁定時定候推出內容；但我覺得呢種機械式嘅操作，正係消耗自己同別人生命嘅作孽。既然我自己都唔想浪費時間，我亦都唔會浪費其他人嘅時間，記得 2020 年我曾經想從此收筆，但之後又反悔，但個陣同自己講過，要持之以恆，心態上要做到那怕得返自己一個讀者，都會寫落去，咁先至值得繼續；意思唔係要曲高和寡離地萬丈，而係要提醒自己，唔好為寫文而寫文，為拍片而拍片，為演算法服務，因為咁做只會令內容同生命變得枯燥乏味。所以，目前我最想做嘅係，將手頭上嘅工作減到最少，然後騰出空間去發掘自己有興趣而又真正有用嘅題材同項目。

最後借呢個機會多謝「尚生活」團隊嘅努力同包容。希望呢個新嘅平台可以茁壯成長，為世界各地嘅香港人提供有養份嘅精神食糧。

圖片由作者提供

---

PREVIOUS ARTICLES